پاکستان نے منگل کی صبح کراچی میں نجی گارڈ سے جھگڑے کے بعد فائرنگ کے نتیجے میں دو چینی شہریوں کے زخمی ہونے پر افسوس کا اظہار کرتے ہوئے کہا کہ ذمہ دار فرد کو ہر صورت انصاف کے کٹہرے تک لایا جائے گا۔

پاکستان کی وزارت خارجہ کی جانب سے منگل کی شام جاری ہونے والے ایک بیان میں کہا گیا کہ ’پاکستان چینی شہریوں، منصوبوں اور اداروں کے تحفظ کے لیے اپنے غیر متزلزل عزم کا اعادہ کرتا ہے۔‘

بیان میں مزید کہا گیا کہ ’کراچی میں پیش آنے والے واقعے کی تفتیش جاری ہے۔ ہم زخمیوں کے اہل خانہ سے ہمدردی کا اظہار کرتے ہیں اور ان کی جلد صحت یابی کے لیے دعاگو ہیں۔‘

بیان میں کہا گیا کہ پاکستان کی وزارت خارجہ اور وزارت داخلہ اس سلسلے میں اسلام آباد میں تعینات چینی سفارت خانے کے عملے کے ساتھ قریبی رابطے میں ہے۔

وزارت خارجہ کے بیان میں بتایا گیا کہ ’پاکستان اور چین قریبی شراکت دار اور آہنی بھائی ہیں، جو باہمی احترام اور مشترکہ تقدیر کے بندھن میں متحد ہیں۔‘

اس سے قبل منگل کی صبح کراچی میں ایک محافظ نے ایک ٹیکسٹائل مل میں کام کرنے والے دو چینی شہریوں کو گولی مار کر زخمی کر دیا تھا۔

حکام کا کہنا تھا کہ اس حملے کا عسکریت پسندی سے کوئی تعلق نہیں۔

چین پاکستان میں کام کرنے والے اپنے شہریوں کے لیے اکثر بہتر سکیورٹی کا مطالبہ کرتا آ رہا ہے۔

گذشتہ ماہ کراچی ہوائی اڈے کے باہر ایک خودکش کار بم دھماکے میں دو چینی شہری مارے گئے تھے۔

ہزاروں چینی بیجنگ کے اربوں ڈالر کے بیلٹ اینڈ روڈ انیشی ایٹو (سی پیک) کے لیے کام کی غرض سے پاکستان میں موجود ہیں۔

کچھ چینی فیکٹریوں میں بھی کام کرتے ہیں، جن کی درست تعداد معلوم نہیں۔

صوبائی محکمہ داخلہ کے ترجمان سہیل جوکھیو نے کہا کہ ٹیکسٹائل مل میں پیش آئے واقعے میں ملوث محافظ کو گرفتار کر لیا گیا ہے اور پولیس تحقیقات کر رہی ہے کہ ملزم نے فائرنگ کیوں کی۔

انہوں نے کہا کہ زخمی چینیوں کو ہسپتال منتقل کر دیا گیا ہے۔

پاکستان ماضی میں کئی بار کہہ چکا ہے کہ وہ ملک میں کام کرنے والے چینیوں کو مکمل تحفظ فراہم کرنے کے لیے پرعزم ہے۔