سہ فریقی کرکٹ سیریز کے فائنل میں جمعے کو نیوزی لینڈ نے پاکستان کو پانچ وکٹوں سے شکست دے کر سیریز جیت لی۔
کراچی کے نیشنل بینک سٹیڈیم میں ہونے والے میچ میں پاکستان نے ٹاس جیت کر پہلے بیٹنگ کا فیصلہ کیا اور نیوزی لینڈ کو 243 رنز کا ہدف دیا، جو اس نے باآسانی حاصل کر لیا۔
نیوزی لینڈ کے ڈیرل مچل نے 57 اور ٹام لیتھم نے 56 رنز کی اننگز کھیلی جبکہ ڈیوڈ کونوے نے 48 اور کین ولیم سن نے 34 رنز بنائے۔
مزید پڑھ
اس سیکشن میں متعلقہ حوالہ پوائنٹس شامل ہیں (Related Nodes field)
پاکستان کے نسیم شاہ نے آٹھ اوورز میں 43 رنز دے کر دو کھلاڑیوں کو آؤٹ کیا۔
شاہین آفریدی نے نو اوورز میں 45 رنز دے کر ایک وکٹ لی۔ اسی طرح ابرار احمد نے 10 اوورز میں 67 رنز دے کر ایک وکٹ اور سلمان آغا نے 10 اوورز میں 45 رنز دے کر ایک وکٹ لی۔
جبکہ خوشدل شاہ نے چھ اوور میں کوئی وکٹ لیے بغیر 22 رنز اور فہیم اشرف نے 2.2 اوورز میں کوئی بھی وکٹ لیے بغیر 16 رنز دیے۔
اس سے قبل پاکستان کی اننگز کا آغاز جاندار نہیں ہو سکا تھا اور 16 رنز پر ہی اس وقت پہلی وکٹ گر گئی، جب اوپنر بلے باز فخر زمان 15 گیندوں پر 10 رنز بنا کر پویلین لوٹ گئے۔
نئے آنے والے بلے باز سعود شکیل بھی زیادہ دیر کریز پر نہ ٹھہر سکے اور صرف آٹھ رنز بنا کر چلتے بنے۔
پاکستان کی جانب سے فخر زمان اور بابر اعظم نے اننگز کا سست آغاز کیا اور دونوں بیٹرز کیوی بولرز کے سامنے کھل کر نہ کھیل سکے۔
سٹار بلے باز بابر اعظم بھی اپنی خراب فارم سے باہر نہ نکل سکے اور وہ 29 رنز بنا کر نیتھن سمتھ کے ہاتھوں آؤٹ ہو گئے۔
چوتھی وکٹ کے لیے کپتان محمد رضوان اور آغا سلمان کے درمیان 120 گیندوں پر 82 رنز کی شراکت قائم ہوئی، جس نے پاکستانی ٹیم کو مشکل وقت میں سہارا دیا اور سکور میں اضافہ ہوتا گیا۔
ابھی ٹیم کچھ سنبھلی ہی تھی کہ محمد رضوان 46 رنز بنا کر وِل او رُورک کی گیند پر بولڈ ہوگئے۔
بعدازاں آغا سلمان بھی تھوڑی دیر بعد 45 کے انفرادی سکور پر مائیکل بریسویل کی گیند پر میدان چھوڑ گئے۔
طیب طاہر نے تیز رفتاری سے بیٹنگ شروع کرنا شروع کی، لیکن جیکب ڈفی نے انہیں 38 رنز پر آؤٹ کر دیا۔
اس کے بعد خوشدل شاہ بھی مچل سینٹنر کے ہاتھوں آؤٹ ہو گئے۔ شاہین آفریدی بھی تیز کھیلنے کی ناکام کوشش میں مچل سینٹنر کا نشانہ بنے۔
نویں وکٹ کے لیے فہیم اشرف اور نسیم شاہ کے درمیان 39 رنز کی پارنٹرشپ قائم ہوئی، لیکن فہیم اشرف 22 رنز بنا کر ول او رُورک ہاتھوں آؤٹ ہوگئے۔
پاکستان کی آخری وکٹ 242 رنز پر گری، جب نسیم شاہ 19 رنز پر ول او رُورک کی گیند کا نشانہ بنے۔
