افغانستان میں طالبان حکام کی جانب سے منشیات پر پابندی عائد کرنے کے بعد وہاں افیون کی قیمتوں میں 10 گنا اضافہ ہوا ہے۔
اقوام متحدہ کے ادارہ انسداد منشیات و جرائم (یو این او ڈی سی) نے بتایا ہے کہ 2022 میں یہ پابندی نافذ ہونے سے پہلے افغانستان میں ایک کلوگرام افیون کی قیمت 75 ڈالر تھی جو گذشتہ سال 750 تک پہنچ گئی۔ افیون کی پیداوار اور پوست کی کاشت میں بڑے پیمانے پر کمی اس اضافے کا بنیادی سبب ہے۔
ادارے نے بتایا ہے کہ 2021 کے بعد ملک میں ضبط کی جانے والی ہیروئن اور افیون کی مقدار میں تقریباً نصف کمی آئی ہے۔ اس سے اندازہ ہوتا ہے کہ پابندی کے بعد ملک میں افیون کی پیداوار میں آنے والی کمی کے نتیجے میں اس سے تیار ہونے والی منشیات کی تجارت کے حجم میں بھی نمایاں کمی واقع ہوئی ہے۔
افیون ہیروئن کی تیاری میں استعمال ہونے والا بنیادی قدرتی جزو ہے۔ اس وقت دنیا میں افغانستان، کولمبیا اور میانمار غیرقانونی طور پر افیون پیدا کرنے والے سب سے بڑے ممالک ہیں۔
ادارے کا کہنا ہے کہ بلند قیمتوں کی وجہ سے اب بھی افیون کی پیداوار سے بھاری منافع کمایا جا رہا ہے جس سے منشیات کے بڑے تاجر اور برآمد کنندگان فائدہ اٹھا رہے ہیں۔
'یو این او ڈی سی' کا اندازہ ہے کہ 2022 میں افیون سے 13,200 ٹن منشیات تیار کی گئی تھی جو 2027 تک افغان منشیات کی طلب کو پورا کرنے کے لیے کافی ہو سکتی ہے۔
ادارے کی ایگزیکٹو ڈائریکٹر غادہ ولی نے کہا ہے کہ افیون کی قیمتوں میں اضافے اور اس کی اب تک پیداوار سے بڑی مقدار میں بنائی جانے والی منشیات کی موجودگی کا مطلب یہ ہے کہ منشیات کی خرید و فروخت اب بھی افغانستان میں بھاری منافع دینے والی غیر قانونی تجارت ہے۔ یہ منافع بین الاقوامی منظم جرائم پیشہ گروہوں کو جاتا ہے جو افغانستان، اس خطے اور دیگر ممالک میں عدم استحکام پیدا کرتے ہیں۔
مزید پڑھ
اس سیکشن میں متعلقہ حوالہ پوائنٹس شامل ہیں (Related Nodes field)
موجودہ حالات میں انسداد منشیات کی ایسی مربوط حکمت عملی درکار ہے جو منشیات فروشی کے نیٹ ورک کو ہدف بنانے میں مدد دے۔ اس کے ساتھ، افغانستان میں کسانوں کو متبادل معاشی مواقع مہیا کرنا بھی ضروری ہیں تاکہ ملک اور اس کے لوگوں کو طویل مدتی استحکام میسر آئے۔
'یو این او ڈی سی' کا کہنا ہے کہ افیون کی کاشت میں کمی آنے سے قبل افغانستان میں موجود اس کے ذخائر کی قیمت 4.6 سے 5.9 ارب ڈالر کے درمیان تھی جو 2023 میں ملکی معیشت کا تقریباً 23 تا 29 فیصد بنتی ہے۔ اس سے بعض افغان شہریوں کو معاشی مسائل سے نکلنے میں بھی مدد ملی ہے جن کا انہیں طالبان کی واپسی کے بعد سامنا رہا ہے۔
ادارے کا کہنا ہے کہ ملک میں افیون کے 60 فیصد ذخائر بڑے تاجروں اور برآمد کنندگان کے ہاتھ میں ہیں جبکہ 30 فیصد کی ملکیت کسانوں کے پاس ہے۔ جو کسان قبل ازیں افیون کاشت کرتے تھے انہیں اب شدید معاشی مشکلات کا سامنا ہے۔
ایسے کسانوں کو دوبارہ افیون کی کاشت کی جانب راغب ہونے سے روکنے کے لیے مستحکم معاشی متبادل مہیا کرنے کی اشد ضرورت ہے۔
ادارے نے خبردار کیا ہے کہ افیون کی قلت کے باعث فینٹانائل جیسی سنتھیٹک منشیات کی تجارت میں اضافہ ہو سکتا ہے جو ہیروئن سے کہیں زیادہ خطرناک ہیں۔
ادھر ایران کے ڈرگ کنٹرول ہیڈکوارٹرز کے سیکرٹری جنرل حسین زولفقاری نے ویانا میں اس اجلاس کے موقع پر افغانستان میں زیر زمین ہیروئن اور میتھامفیٹامائن کی تیاری پر تشویش ظاہر کی ہے۔
