پاکستانی یوٹیوبر اور وی لاگر رجب بٹ کے خلاف ایک شہری کی درخواست پر لاہور کے تھانہ نشتر ٹاؤن میں مقدمہ درج ہوا ہے، جس میں پیکا ایکٹ اور توہین مذہب کی دفعات شامل کی گئی ہیں۔
شہری کی درخواست پر پولیس نے ملزم رجب بٹ کے خلاف تعزیرات پاکستان کی دفعہ 295 اے اور پریوینشن آف الیکٹرانک کرائمز ایکٹ (پیکا) 2016 کے تحت مقدمہ درج کیا ہے۔
تاہم پولیس کے مطابق رجب بٹ ان دنوں عمرے کی ادائیگی کے لیے سعودی عرب میں ہیں اس لیے انہیں ابھی تک گرفتار نہیں کیا جا سکا ہے۔
پاکستان کے معروف یوٹیوبر رجب بٹ کے خلاف مقدمہ لاہور کے علاقے سنت نگر کے رہائیشی سید حیدر علی شاہ کی درخواست پر درج کیا گیا ہے۔
انہوں نے مؤقف اختیار کیا ہے کہ ’میں اپنے دوستوں کے ہمراہ موبائل پر ویڈیوز دیکھ رہا تھا۔ جس میں رجب بٹ نے کہا کہ میرے استاد سدھو موسے والا پر بھی توہین مذہب کی دفعہ 295 سی لگی تھی اور مجھ پر بھی لگی ہے۔ اس لیے ہم جو پرفیوم لانچ کر رہے ہیں اس کا نام بھی 295 سی ہے۔‘
ایف آئی آر میں کہا گیا ہے کہ ’رجب بٹ اپنے یوٹیوب چینل پر بے حیائی پر مبنی ویڈیوز سے نوجوان نسل کو تباہ کر رہے ہیں۔‘
درخواست میں مزید کہا گیا ہے کہ ’اس اکاؤنٹ سے یوٹیوب ویڈیوز کے ذریعے معاشرے میں فحاشی پھیلائی جا رہی ہے اور بدفعلی کا ماحول پیدا کیا جاتا ہے۔
’رجب بٹ نے کئی ویڈیوز میں مذہب اسلام کا تمسخر اڑایا اور اسلامی نظریات کے منافی گفتگو کر کے نوجوانوں کے ذہن اسلام سے بدظن کر رہا ہے۔ لہذا توہین مذہب کرنے پر قانون کے مطابق کارروائی کی جائے۔‘
یوٹیوب پر ’فیملی وی لاگ‘ بنانے والے رجب بٹ اس سے قبل بھی لائسنس بغیر شیر کا بچہ اور اسلحہ رکھنے پر گرفتار کیے جا چکے ہیں۔
مزید پڑھ
اس سیکشن میں متعلقہ حوالہ پوائنٹس شامل ہیں (Related Nodes field)
انہیں 50 ہزار روپے جرمانے کے ساتھ ایک سال تک کمیونٹی سروس کی سزا سنائی گئی تھی۔
اس حوالے سے سوشل میڈیا پر رجب بٹ کی ایک ویڈیو گردش کر رہی ہے جس میں انہیں ہاتھ میں قرآن لیے اپنے بیان کے حوالے سے وضاحت کرتے دیکھا جا سکتا ہے۔
اس ویڈیو میں رجب بٹ کو کہتے سنا جا سکتا ہے کہ ’کچھ دن پہلے میں نے اپنا پرفیوم 295 کے نام سے لانچ کیا تھا۔ اس میں میرا ہرگز مقصد یہ نہیں تھا کہ میں 295 اے اور 295 سی کا انکاری ہوں۔‘
انہوں نے مزید کہا کہ ’میں ناموس رسالت کے قانون کو دل و جان سے تسلیم کرتا ہوں۔‘
رجب بٹ نے کہا کہ ’295 پرفیوم کو لانچ اور مشہوری کرتے ہوئے میرے منہ سے لاعلمی کے طور پر جو غلط الفاظ نکلے ہیں میں ان پر اللہ اور اس کے رسول کی بارگاہ میں کھڑے ہو کر معافی مانگتا ہوں اور توبہ کرتا ہوں۔‘
ساتھ ہی انہوں نے اعلان بھی کیا کہ ’295 پرفیوم کو میں ابھی ڈس کنٹینیو کرتا ہوں، ختم کر رہا ہوں۔ میرے الفاظ سے کسی مسلمان کی بھی دل آزاری ہوئی ہے تو میں آپ سب سے بھی معافی مانگتا ہوں۔‘
تاہم یہ ویڈیو رجب بٹ کے آفیشل سوشل میڈیا اکاؤنٹس پر موجود نہیں ہے۔
