افغان طالبان کے رہنما اور کلچرل کمیشن کے رکن عبدالقہار بلخی کا کہنا ہے کہ سیاسی حکومت کے قیام کے ساتھ ساتھ اس پر بھی بات ہو رہی ہے کہ ملک کا دارالحکومت کابل ہی رہے گا یا پھر طالبان گروپ کی جائے پیدائش قندہار کو دارالحکومت کا درجہ دیا جائے گا۔

ان خیالات کا اظہار انہوں نے اتوار کو الجزیرہ ٹی وی کو دیے جانے والے اپنے انٹر ویو میں کیا ہے۔  

انہوں نے سیاسی حکومت کے حوالے سے کہا ہے کہ صلاح مشورے جاری ہیں اور بلاشبہ اس نظام میں تمام فریق شامل ہوں گے۔

ان کے مطابق: ’ہم بات چیت کر رہے ہیں اور ہمارے درمیان تعلق قائم ہے۔ سکیورٹی انتظامات کے معاملے میں امریکیوں کے ساتھ تعلقات قائم ہیں۔ بیرونی چوکیاں ہمارے زیر انتظام ہیں اور داخلی چوکیوں کا کنٹرول امریکہ کی فورسز کے پاس ہے اور وہ ایک دوسرے کے ساتھ مسلسل رابطے میں ہیں۔‘

ہوائی اڈوں خصوصا کابل کے ہوائی اڈے پر پیش آنے والے حالیہ واقعات پر ان کا کہنا تھا کہ ’اس وقت جس طرح لوگ ہوائی اڈے کی طرف بھاگ رہے ہیں یہ بڑے افسوس کی بات ہے۔ میرا خیال ہے کہ صورت حال کہیں بہتر ہونی چاہیے تھی کیونکہ ہم نے ہر کسی کے لیے عام معافی کا اعلان کیا ہے۔ سکیورٹی فورسز کے لیے اعلیٰ سے نچلی سطح تک اور خوف اور ہیجان کی جو فضا پیدا ہوئی ہے یہ بے بنیاد ہے۔‘

افغان طالبان کے رہنما عبدالقہار بلخی کا کہنا ہے کہ ’صورت حال میں اتنی تیزی سے تبدیلی آئی کہ تمام لوگ حیران رہ گئے۔ جب ہم کابل میں داخل ہوئے تو اس کی پیشگی منصوبہ بندی نہیں کی گئی تھی کیونکہ ہم نے ابتدائی طور پر اعلان کیا تھا کہ ہم کابل میں داخل نہیں ہونا چاہتے۔ ہم کابل میں داخل ہونے سے پہلے سیاسی تصفیہ اورایسی مخلوط حکومت چاہتے تھے جس میں سب شامل ہوں لیکن ہوا یہ کہ سکیورٹی فورسز چلی گئیں اور انہوں نے اپنی جگہ چھوڑ دی۔‘

عبدالقہار بلخی نے الجزیرہ ٹی وی کو انٹرویو میں بتایا کہ ’ہم اپنی فورسز کو یہ کہنے پر مجبور ہو گئے کہ وہ کابل میں داخل ہو جائیں۔‘

خواتین کے خقوق کے سوال کے جواب میں انہوں نے کہا کہ خواتین کے حقوق کے بارے میں کوئی ابہام نہیں ہے۔ نہ صرف خواتین بلکہ مرد حضرات اور بچوں کے حقوق کے معاملے میں بھی کوئی ابہام نہیں۔ ’اس وقت ہمیں ایسی صورت حال کا سامنا ہے جس کے حوالے سے امید ہے کہ صلاح مشورے کے دوران وضاحت ہو جائے گی کہ یہ حقوق کیا ہیں‘۔

انہوں نے بتایا کہ ہماری اولین ترجیح اپنی صفوں میں نظم و ضبط ہے دوسروں پر قانون نافذ کرنا نہیں بلکہ قانون کو پہلے اپنے اوپر نافذ کرنا اور اس کے بعد باقی معاشرے کے لیے مثال پیش کرنا اولین ترجیح ہے۔

ان کے مطابق: ’سب سے پہلے ہماری اور ہمارے ارکان کی باری ہے اور اگر وہ کسی کارروائی میں ملوث پائے گئے تو سب سے پہلے ان کے خلاف قانونی کارروائی ہو گی۔‘

عبدالقہار بلخی کا کہنا ہے کہ وہ نہیں سمجھتے کہ لوگ طالبان کو دہشت گرد خیال کرتے ہیں۔ ان کے مطابق دہشت گردی کے خلاف جنگ محض ایک اصطلاح تھی جسے امریکہ نے تراشا اور جو لوگ مطابقت نہیں رکھتے تھے انہیں دہشت گرد قرار دے دیا گیا۔

افغانستان میں روس کے سفیر دمتری زیرنوف نے کہا ہے کہ طالبان نے ان کے سفارت خانے سے کہا ہے کہ شمالی افغانستان میں موجود حکومتی حامیوں کو ان کی طرف سے معاہدے کی پیشکش کا پیغام پہنچا دیا جائے۔

صوبہ پنجشیر میں افغان سکیورٹی فورسز کی حمایت کرنے والے مسلح افغان شہری طالبان کے خلاف مزاحمت کرنے کے لیے سازو سامان سے لیس ہیں (اے ایف پی)

خبر رساں ادارے ایسوسی ایٹڈ پریس کے مطابق روسی سفیر نے ہفتے کو بتایا ہے کہ طالبان کی سیاسی قیادت کے ایک اعلیٰ رکن نے روس سے کہا ہے کہ وادی پنجشیر میں جنگجوؤں کو بتائیں کہ طالبان کو امید ہے کہ طالبان علاقے میں صورت حال کے مسئلے کو سیاسی معاہدے کے ذریعے حل کرنے میں کامیاب ہو جائیں گے۔

روسی سفارت کار کا کہنا ہے کہ طالبان کا دعویٰ ہے کہ وہ علاقے میں خونریزی نہیں چاہتے۔ واضح رہے کہ وادی پنجشیر افغان دارالحکومت کابل کے شمال میں واقع ہے اور شمالی اتحاد کے ان مسلح دھڑوں کا مضبوط گڑھ ہے جنہوں نے 2001 کے حملے کے دوران اتحادی فوجوں کے ساتھ اتحاد کیا۔ وادی پنجشیر افغانستان کا واحد علاقہ ہے جس پر طالبان کنٹرول حاصل نہیں کرسکے۔

کابل اور افغانستان کے دوسرے حصوں پر طالبان کے قبضے کے دوران جن حکومتی شخصیات نے اس علاقے میں پناہ لی ان میں نائب صدر امراللہ صالح بھی شامل ہیں جنہوں نے صدر اشرف غنی کے متحدہ عرب امارات فرار ہونے کے بعد اپنی ٹویٹ میں کہا تھا کہ اب وہ افغانستان کے قانونی صدر ہیں۔

ماسکو جس کی افغانستان میں 10 سالہ جنگ 1989 میں فوجوں کے انخلا کے ساتھ ہی ختم ہو گئی تھی، گذشتہ برسوں میں مصالحت کار کی حیثیت سے سفارت سطح پر واپس آیا اور اس نے مختلف افغان دھڑوں کے ساتھ رابطہ کیا جس میں طالبان بھی شامل ہیں۔

فیفا اور فیف پرو افغان فٹبالرز کو نکالنے کے لیے سرگرم

فٹ بال کی عالمی تنظیم فیفا کی سیکرٹری جنرل فاطمہ سمورا فیفا انڈر ٹوینٹی وومنز ورلڈ کپ فرانس 2018 کے موقع پر موجود ہیں (اے ایف پی فائل)

فٹ بال کی عالمی تنظیم فیفا کی سیکرٹری جنرل فاطمہ سمورا نے اتوار کو کہا ہے کہ فیفا اور کھلاڑیوں کی یونین فیف پرو ان کھلاڑیوں کو افغانستان سے نکالنے کے لیے ایک دوسرے تعاون کر رہی ہیں جو وہاں سے نکلنا چاہتے ہیں۔

فرانسیسی خبر رساں ادارے اے ایف پی کے مطابق گذشتہ ہفتے طالبان نے افغان دارالحکومت کابل پر قبضہ کر لیا تھا جس کے بعد سے ہزاروں افراد ملک سے نکلنے کی کوششوں میں مصروف ہیں اورلوگوں کو طیارے کے ذریعے نکالنے کے عمل کو تاریخ کا مشکل ترین آپریشن قرار دیا جا رہا ہے۔

سمورا کہنا تھا کہ ’ہم فیف پرو کے ساتھ مل کر کام کر رہے ہیں۔ فیفا ماضی میں بھی ایسا کر چکی ہے۔ ہمارے اندر دوبارہ ایسا کرنے کی صلاحیت ہونی چاہیے۔‘

فیف پرو نے جمعے کو اپنی ٹویٹ میں کہا تھا کہ تنظیم ’ان کھلاڑیوں کو نکالنے کا منصوبہ تیار کرنے کی خاطر حکومتوں کے ساتھ رابطے میں ہے جو خطرے میں گھرے ہوئے ہیں۔ ان کوششوں کا بنیادی مقصد جتنے زیادہ لوگوں کو ممکن ہو سکے تحفظ فراہم کرنا ہے۔‘

جمعرات کو فٹبال کے کھلاڑیوں کی تنظیم نے افغانستان کی قومی فٹبال ٹیم کے کھلاڑی ذکی انور کو خراج عقیدت پیش کیا جو گذشتہ ہفتے کابل کے ہوائی اڈے پر طیارے سے گر کر ہلاک ہو گئے تھے۔

کابل ہوائی اڈے پر افراتفری سے مزید سات افراد ہلاک: برطانوی فوج 

کابل کے ہوائی اڈے پر اتوار کو طالبان نے افراتفریح پر قابو پانے کے لیے ہوائی فائرنگ کی اور لوگوں کو قابو کرنے کے لیے ہوائی اڈے باہر اور اندرقطاریں لگوانا شروع کی ہیں۔

عینی شاہدین نے خبر رساں ادارے روئٹرز کو بتایا ہے کہ بھگدڑ مچنے سے کئی افراد زخمی ہوئے ہیں۔

برطانوی فوج نے اتوار کو کہا ہے کہ کابل کے بین الاقوامی ہوائی اڈے کے ارد گرد افراتفری سے مزید سات افغان شہری ہلاک جبکہ بھگدڑ سے متعدد کچل کر زخمی ہو گئے۔

گذشتہ ہفتے بھی کابل کے ہوائی اڈے پر افراتفری پر قابو پانے کے لیے امریکی اہلکاروں کی ’ہوائی فائرنگ‘ کے نتیجے میں پانچ افراد ہلاک ہو گئے تھے۔

روئٹرز کے مطابق اتوار کو نئی ہلاکتیں افغانستان میں داعش گروپ سے جڑے نئے خطرے کے بعد سامنے آئی ہیں جب امریکہ کے متعدد فوجی طیارے طالبان جنگجوؤں سے گھرے ہوائی اڈے پر لینڈنگ کر رہے ہیں۔

یہ طیارے لینڈنگ اور ٹیک آف کے وقت حرارت خارج کرنے والے شاٹس فائر کرتے ہیں تاکہ داعش کی جانب سے گرمی کا تعاقب کرنے والے ممکنہ اینٹی ایئرکرافٹ میزائلوں سے بچا جا سکے۔

امریکی کنٹرول والے ہوائی اڈے کے باہر چوکیاں بنانے والے طالبان کی جانب سے ملک سے فرار ہونے کے لیے کوششیں کرنے افراد کو دور رکھنے کی کوشش میں ہوائی فائرنگ کی بھی اطلاعات ہیں۔

برطانوی وزارت دفاع نے ایک بیان میں کہا: ’زمین پر حالات انتہائی سنگین ہیں لیکن ہم ہر ممکن کوشش کر رہے ہیں کہ صورت حال کو زیادہ سے زیادہ محفوظ بنایا جا سکے۔‘

امریکی شہری کابل کے ہوائی اڈے پر آنے سے گریز کریں: امریکہ

امریکہ نے افغانستان میں اپنے شہریوں پر زور دیا ہے کہ وہ ’ممکنہ سیکیورٹی خطرات‘ کے باعث کابل کے حامد کرزئی ہوائی اڈے پہنچنے سے گریز کریں۔