جدہ التاریخیہ سعودی عرب کے ساحلی شہر جدہ کا دوسرا رخ ہے جہاں شہر کی قدیم ثقافت اور تہذیب کے خوبصورت رنگ نظر آتے ہیں۔

یہ علاقہ جدہ کی تاریخ کا حامل ہے اور یہاں شہر کے قدیم دروازوں، پرانے اوطاقوں اور مساجد کے علاوہ میدان الیعہ بھی ہے جہاں سعودی عرب کے بانی سے جدہ کے اشراف اور اہلیان شہر نے بیعت کی تھی۔

گذشتہ چند سالوں میں اس علاقے پر خصوصی توجہ دی گئی ہے اور یہاں کے ثقافتی رخ کی بحالی پر اس طریقے سے کام کیا گیا ہے۔

اس علاقے میں عمارتوں، دکانوں، راہداریوں اور روشندانوں کو بھی قدیم ثقافتی رنگ دے کر تعمیر کیا گیا ہے۔

یہاں اب ہر سال ثقافتی میلوں اور مختلف پروگراموں کا انعقاد بھی کیا جاتا ہے جس سے نہ صرف اس علاقے کی خوبصورتی کو چار چاند لگ جاتے ہیں بلکہ یہاں بھر پور تجارتی اور سیاحتی سرگرمیاں بھی ہوتی ہیں۔

قدیم جدہ کے سات مختلف محلے تھے اور یہاں پر چار بازار تھے۔ شہر کی قدیم عمارتیں اور مساجد منفرد فن تعمیر کی حامل ہیں۔

2018 میں سعودی فرمانروا شاہ سلمان کے حکم پر جدہ کے تاریخی ورثے کی نگرانی کے لیے ایک ادارہ تشکیل دیا گیا جبکہ 2021 میں باقاعدہ طور پر قدیم شہرکی بحالی کے پروجیکٹ پر کام شروع کردیا گیا۔

15 سالہ اس منصوبے میں جدہ کی 600 قدیم عمارتوں، 36 مساجد اور پانچ بازاروں کی بحالی اور تزئین اور آرائش پر کام کیا جائے گا۔