سعودی ریسرچ اینڈ میڈیا گروپ (ایس آر ایم جی) نے عربی زبان میں ڈاکیومینٹری چینل ’الشرق ڈاکیومینٹری‘ کا آغاز کیا ہے۔

ایس آر ایم جی کی جانب سے جاری بیان کے مطابق الشرق ڈاکیومینٹری نامی اس چینل پر سیاست، کاروبار، معیشت اور تاریخ جیسے موضوعات پر مواد دیکھا جا سکے گا۔

اس کے علاوہ اس چینل پر ناظرین کو تازہ ٹرینڈز، ایونٹس اور بااثر شخصیات کے حوالے سے منفرد معلومات اور جامع تجزیے بھی ملیں گے۔

الشرق ڈاکیومینٹری ایوارڈ یافتہ ’الشرق نیوز نیٹ ورک‘ میں نیا اضافہ ہے جہاں پہلے سے ہی الشرق نیوز، الشرق بزنس بلومبرگ موجود ہیں جبکہ الشرق ڈسکوری کا بھی جلد ہی آغاز متوقع ہے۔

ایس آر ایم جی نے اپنے بیان میں بتایا ہے کہ الشرق ڈاکیومینٹری کو جو چیز منفرد بناتی ہے وہ اس کی ان ہاؤس پروڈکشن کی صلاحیتیں ہیں، جو اسے گہرے اور بے باک تجزیہ فراہم کرنے کے لیے معروف علاقائی اور عالمی خبروں کی سرخیوں سے ہٹ کر خصوصی، گھریلو معیار کے پروگرامنگ تک رسائی فراہم کرے گی۔

بیان کے مطابق ’جب کہ اس وقت مقامی طور پر تیار کی جانے والی دستاویزی فلموں کی کمی ہے، الشرق ڈاکیومینٹری اس خلا کو پُر کرنے کے لیے منفرد مقام رکھتی ہے جو کہ علاقائی فلم سازی کی صنعت کو سپورٹ کرتی ہے اور مقامی اور علاقائی ٹیلنٹ کو فروغ دیتی ہے۔‘

الشرق ڈاکیومینٹری پر اس وقت عربی زبان میں ’سپیس وار‘، ’ریال میڈریڈ‘، ’نیوکلیئر ناؤ‘ جیسی ڈاکیومینٹریز دکھائی جا رہی ہیں۔

الشرق ڈاکیومینٹری مختص ٹی وی چینلز اور سوشل میڈیا اکاؤنٹس کے ساتھ ساتھ لائیو سٹریم پر بھی دستیاب ہے۔