اسلام آباد ہائی کورٹ کے جسٹس محسن اختر کیانی نے منگل کو بلوچ لاپتہ طلبہ کیس میں سماعت کے دوران اٹارنی جنرل کی کوششوں کو سراہتے ہوئے ریمارکس دیے کہ اعتراض ایجنسیوں کے کام پر نہیں بلکہ ان کے ماورائے عدالت کام پر اعتراض ہے۔
منگل کو جسٹس محسن اختر کیانی پر مشتمل سنگل رکنی بینچ نے لاپتہ بلوچ طلبہ کے کیس کی سماعت کی، جس کے آغاز پر اٹارنی جنرل پاکستان منصور عثمان اعوان نے بتایا کہ ’لاپتہ افراد کا معاملہ کابینہ کے اگلے دو اجلاسوں میں اٹھایا جائے گا۔‘
انہوں نے لاپتہ افراد کی بازیابی کے لیے بنائی گئی کمیٹی میں انٹیلی جنس اداروں کے سربراہوں کو تبدیل کرنے کی تجویز دیتے ہوئے کہا کہ ’کمیٹی میں ڈائریکٹر جنرل کی سطح سے نیچے کے لوگ شامل کریں تاکہ کوآرڈینیشن میں آسانی ہو۔ اس معاملے کو اگر حل نہ کیا تو مسائل بڑھیں گے۔ ‘
جسٹس محسن اختر کیانی نے اٹارنی جنرل کی کوششوں کی تعریف کرتے ہوئے کہا کہ ’اٹارنی جنرل کی کاوشوں سے بہت سے لاپتہ افراد اپنے گھروں کو پہنچ گئے ہیں۔ یہ ایک کیس نہیں ہے کہ اس پر آرڈر کریں اور بات ختم ہو جائے۔ الزام ہے کہ بہت سے لوگ ایجنسیوں کی تحویل میں ہوتے ہیں۔ وہ کھاتے پیتے بھی ہوں گے۔ خرچ سرکاری خرانے پر آتا ہوگا؟ کیا ایجنسیوں کے فنڈز کا کوئی سالانہ آڈٹ بھی ہوتا ہے؟‘
انہوں نے مزید کہا کہ ’اس ملک نے دہشت گردی میں 70 ہزار جانیں گنوائی ہیں۔ کوئی بھی پاکستانی خواہ وہ صحافی ہو یا پارلیمنٹیرین وہ دہشت گردوں کو سپورٹ نہیں کر رہا۔ ایجنسیوں کے کام پر کسی کو اعتراض نہیں۔ اعتراض ماورائے قانون کام کرنے پر ہے۔ ایجنسیوں کے کام کرنے کاطریقہ کار واضح ہو جائے تو اچھا ہو گا۔ ہم نے پولیس، سی ٹی ڈی اور ایف آئی اے کو مؤثر بنانا ہے۔ یہی تین ادارے ہیں جنہوں نے تفتیش کرنی ہوتی ہے، باقی ایجنسیاں ان کی معاونت کر سکتی ہیں۔‘
جس پر اٹارنی جنرل نے کہا کہ ’ریاست کے لیے ہمدردی دکھانی پڑے گی۔ ہماری معیشت بہت نیچے جا چکی ہے۔‘
جسٹس محسن کیانی نے مزید کہا کہ ’ان حالات میں ملکی یاغیر ملکی سرمایہ کار کیسے یہاں سرمایہ کاری کریں گے۔‘
سماعت کے دوران جسٹس محسن اختر کیانی نے وزیرِ قانون اعظم نذیر تارڑ کی گذشتہ روز کی گئی ایک پریس کانفرنس پر ریمارکس دیتے ہوئے کہا کہ ’جو پریس کانفرنس کرتا ہے، کرتا رہے اس سے کوئی فرق نہیں پڑتا۔‘
پیر کو وزیرِ قانون اعظم نذیر تارڑ نے پریس کانفرنس میں لاپتہ شاعر احمد فرہاد کے کیس میں اسلام آباد ہائی کورٹ کے ریمارکس پر مایوسی کا اظہار کرتے ہوئے کہا تھا کہ ’لاپتہ افراد کے معاملے پر سکے کے دونوں رخ دیکھنے چاہییں۔‘
مزید پڑھ
اس سیکشن میں متعلقہ حوالہ پوائنٹس شامل ہیں (Related Nodes field)
ان کا مزید کہنا تھا کہ عدالت نے کہا کہ سیکرٹریز مطمئن نہیں کریں گے تو وزیراعظم اور پوری کابینہ کو یہاں بٹھائیں گے، یہ طریقہ ہمیشہ غیرمناسب رہا ہے اور وقت سے پہلے اتنی سخت باتیں ایک سانس میں کہہ دینا عدلیہ کے مطابق نہیں ہے۔‘
سماعت کے بعد عدالت عالیہ نے اٹارنی جنرل کو سوالنامے کے جوابات آئندہ سماعت پر جمع کروانے کی ہدایت کرتے ہوئے سماعت 14 جون تک ملتوی کر دی۔
اگر بندہ ریکور نہیں ہو گا تو یہ ریاست کی ناکامی ہو گی: جسٹس محسن اختر کیانی
لاپتہ شاعر احمد فرہاد کی بازیابی کی درخواست پر سماعت میں اسلام آباد ہائی کورٹ نے اٹارنی جنرل کو چار دن کا وقت دیا ہے۔
سماعت کے دوران جسٹس محسن اختر کیانی نے ریمارکس دیے کہ ’آپ نے یقینی بنانا ہے کہ اسلام آباد سے کوئی بندہ اٹھایا نہیں جائے گا، اگر بندہ ریکور نہیں ہو گا تو یہ ریاست کی ناکامی ہو گی۔‘
جسٹس محسن اختر کیانی نے منگل کو کیس کی سماعت کی جس میں سیکریٹری داخلہ، آئی جی اور اٹارنی جنرل عدالت میں پیش ہوئے۔
سماعت کے آغاز میں اٹارنی جنرل منصور عثمان اعوان روسٹرم پر آئے اور احمد فرہاد کی بازیابی کی یقین دہانی کراتے ہوئے کہا کہ ’میں ذمہ داری لیتا ہوں کہ احمد فرہاد کو ریکور کریں گے۔ عدالت دو سے چار دن کا وقت دے میں یقین دہانی کرواتا ہوں۔‘
جسٹس محسن اختر کیانی نے استفسار کیا کہ ’پولیس نے کسی کا بیان قلمبند کیا ہے؟‘ جس پر ایس ایس پی نے جواب دیا کہ ’سینیئر افسر موجود نہیں تھے ہمیں وزارتِ دفاع کے ذریعے تحریری بیان دیا گیا ہے۔‘
جسٹس محسن اختر کیانی نے کہا کہ ’جو بات انہوں نے بتائی ہے کیا وہ 161 کا بیان ہے؟‘
عدالت میں سیکریٹری داخلہ تو پیش ہوئے مگر سیکریٹری دفاع پیش نہ ہوئے۔ اس پر وکیل درخواست گزار ایمان مزاری نے کہا کہ ’جب بھی سیکریٹری دفاع کو بلایا جاتا ہے وہ پیش نہیں ہوتے۔ ایسے کئی لوگ ہیں جنہیں آئی ایس آئی اور ایم آئی ہی اٹھاتی ہے، پہلے بندہ اٹھاتے ہیں بعد میں مکر جاتے ہیں۔‘
اس پر جسٹس محسن اختر کیانی نے ریمارکس دیے کہ ’یہی چیز تو ختم کرنی ہے، عدالت کے بلانے پر سب پیش ہوں گے، اگر وزیراعظم عدالت میں آ سکتا ہے تو سب آ سکتے ہیں اس سے بڑا تو کوئی نہیں، یقینی بنائیں کہ سیکریٹری دفاع آئندہ سماعت پر عدالت میں پیش ہوں۔‘
اسلام آباد ہائی کورٹ نے اٹارنی جنرل کو جمعے تک کا وقت دیتے ہوئے شاعر احمد فرہاد کی بازیابی کے کیس کی سماعت جمعہ تک ملتوی کر دی۔
