پاکستان کی ٹریڈ ڈیولپمنٹ اتھارٹی (ٹی ڈی اے پی) اور وزارت تجارت پانچ سے سات فروری 2025 تک جدہ سینٹر فار ایگزیبیشنز اینڈ ایونٹس میں میڈ اِن پاکستان نمائش اور بزنس فورم 2025 کی میزبانی کرنے جا رہی ہیں۔
ٹی ڈی اے پی کی پریس ریلیز کے مطابق یہ نمائش مختلف صنعتی شعبوں پر مرکوز ہوگی جن میں خوراک، ٹیکسٹائل، انجینیئرنگ اور خدمات شامل ہیں۔
اس میں کھیلوں کے سامان اور کپڑے، دواسازی، تولیے، تیار شدہ ملبوسات، پراسیس شدہ خوراک، تعمیراتی سامان اور آرکیٹیکچرل ڈیزائن جیسے شعبوں کی مصنوعات اور خدمات پیش کی جائیں گی۔
اس تنوع سے ظاہر ہوتا ہے کہ پاکستان عالمی سطح پر اعلیٰ معیار کی مصنوعات اور خدمات پیش کرنے کی بھرپور صلاحیت رکھتا ہے۔
یہ نمائش پاکستانی کاروباری اداروں کو سعودی اور بین الاقوامی خریداروں اور سرمایہ کاروں سے جوڑنے کے لیے ترتیب دی گئی ہے، تاکہ پاکستان کی مصنوعات کو سعودی مارکیٹ میں فروغ دیا جا سکے۔
یہ نمائش نہ صرف ایک تجارتی شو بلکہ بزنس ٹو بزنس پلیٹ فارم کے طور پر بھی کام کرے گی جہاں کاروباری شخصیات، سرمایہ کار اور حکومتی نمائندے ایک دوسرے سے براہ راست بات چیت اور تعاون کر سکیں گے۔
مزید پڑھ
اس سیکشن میں متعلقہ حوالہ پوائنٹس شامل ہیں (Related Nodes field)
اس میں نیٹ ورکنگ اور شراکت داری کے آغاز کے لیے ایک منفرد موقع فراہم کیا جائے گا۔
مختلف صنعتوں، جیسے مینوفیکچرنگ، صحت عامہ، اور ٹیکسٹائل کے شرکا اس میلے کی اہمیت اور وسعت کو اجاگر کریں گے۔
یہ تین روزہ ایونٹ ایک جامع تجارتی نمائش، بزنس ٹو بزنس ملاقاتوں، اور سیمینارز پر مشتمل ہوگا، جس میں 135 سے زائد پاکستانی نمائش کنندگان ملک کی متنوع صنعتوں کی نمائندگی کریں گے۔
یہ نمائش بین الاقوامی تجارت اور اقتصادی تعاون کے فروغ میں سٹریٹجک اہمیت کو اجاگر کرتی ہے۔
بیان کے مطابق میڈ اِن پاکستان نمائش اور بزنس فورم عالمی منڈیوں کو وسعت دینے اور دوطرفہ تجارتی تعلقات کو مزید گہرا کرنے کے خواہش مند تمام افراد کے لیے ملاقات کا مرکزی مقام بن چکا ہے۔
چوں کہ اس ایونٹ میں اہم کاروباری معاہدے متوقع ہیں، اس لیے میڈ اِن پاکستان نمائش ایک سنگ میل کی حیثیت اختیار کرنے جا رہی ہے جو تجارت اور سرمایہ کاری کے مزید مواقع پیدا کرنے میں اہم کردار ادا کرے گی۔
میڈ اِن پاکستان نمائش میں شرکت مفت ہے۔ یہ ایونٹ پانچ اور چھ فروری کو صرف تجارتی ماہرین) کے لیے مخصوص ہوگا جب کہ سات فروری کو عام لوگوں کے لیے کھولا جائے گا۔
