امریکہ کے جنوبی اور وسطی ایشیائی امور کے بیورو کے سینیئر بیورو آفیشل (ایس بی او) ایرک میئر نے بدھ کو پاکستان کے وزیر اعظم شہباز شریف سے ملاقات میں سرمایہ کاری سمیت دو طرفہ امور پر بات کی۔
وزیر اعظم کے دفتر سے جاری بیان میں کہا گیا کہ ایس بی او ایرک میئر کی قیادت میں امریکی وفد کی وزیر اعظم سے ملاقات اسلام آباد میں ہوئی۔
امریکی وفد پاکستان منرلز انوسٹمنٹ فورم میں شرکت کے لیے پاکستان کا دورہ کر رہا ہے۔
اس سے قبل امریکی محکمہ خارجہ کی جانب سے ہفتے کو جاری بیان کے مطابق جنوبی اور وسطی ایشیائی امور کے بیورو کے سینیئر افسر ایرک میئر آٹھ سے 10 اپریل تک اسلام آباد میں ہوں گے۔
آج ہونے والی ملاقات میں وزیر اعظم نے اس بات پر زور دیا کہ پاکستان کے معدنیات کے شعبے میں وسیع استعداد موجود ہے اور امریکی کمپنیوں کو اس ترجیحی شعبے میں سرمایہ کاری کے مواقع سے مستفید ہونا چاہیے۔
پاکستان اور امریکہ کے تعلقات کی اہمیت کو اجاگر کرتے ہوئے وزیراعظم نے امریکہ کے ساتھ دوطرفہ تعلقات کو مضبوط بنانے کے لیے صدر ٹرمپ اور ان کی انتظامیہ کے ساتھ مل کر کام کرنے کی پاکستان کی خواہش کا اظہار کیا۔
بیان میں کہا گیا کہ وزیر اعظم نے تجارت اور سرمایہ کاری کے ساتھ ساتھ انسداد دہشت گردی سمیت باہمی دلچسپی کے شعبوں میں تعاون بڑھانے کی اہمیت پر زور دیا۔
امریکی محکمہ خارجہ کے مطابق جنوبی اور وسطی ایشیائی امور کے بیورو کے سینیئر بیورو آفیشل میئر نے پاکستان منرل انویسٹمنٹ فورم کے کامیاب انعقاد پر پاکستان کو مبارکباد دی۔
جبکہ وزیر اعظم شہباز شریف نے پاکستان منرلز انوسٹمنٹ فورم میں امریکی شرکت کا خیرمقدم کیا۔
بیان کے مطابق: ’انہوں (ایرک میئر) نے پاکستان کے معدنیات کے شعبے کی وسیع استعداد کا اعتراف کیا اور امریکی کمپنیوں کی جانب سے اس شعبے میں سرمایہ کاری میں دلچسپی سے آگاہ کیا۔‘
انہوں نے مشترکہ دلچسپی کے امور پر پاکستان کے ساتھ کام کرنے کی امریکی خواہش کا بھی اظہار کیا۔
امریکی محکمہ خارجہ کے مطابق جنوبی اور وسطی ایشیائی امور کے بیورو کے سینیئر بیورو آفیشل میئر نے کہا کہ ’امریکہ پاکستان کے ساتھ دوطرفہ تعلقات کے مزید فروغ کا خواہاں ہے۔‘
اس اجلاس میں نائب وزیراعظم و وزیر خارجہ محمد اسحاق ڈار، وفاقی وزیر برائے اقتصادی امور احد خان چیمہ، وزیر پٹرولیم علی پرویز ملک، معاون خصوصی طارق فاطمی اور دیگر اعلیٰ سطح کے سرکاری حکام نے بھی شرکت کی۔
وزیر داخلہ سے ملاقات
وزارت داخلہ کی جانب سے جاری بیان میں کہا گیا کہ بدھ کو وفاقی وزیر داخلہ محسن نقوی سے پاکستان کے دورے پر آئے امریکی وفد کے سربراہ و امریکی محکمہ خارجہ کے سینیئر عہدیدار ایریک میئر سے ملاقات کی۔
اس ملاقات میں قائم مقام امریکی سفیر نیٹلی بیکر، وزیر مملکت داخلہ طلال چوہدری اور سیکریٹری داخلہ خرم آغا بھی موجود تھے۔
بیان میں کہا گیا کہ ملاقات میں پاکستان امریکہ تعلقات سمیت باہمی دلچسپی کے امور اور دو طرفہ تعاون پر تفصیلی تبادلہ خیال کیا گیا۔
اس موقعے پر وزیر داخلہ نے کہا کہ ’پاکستان منرلز انویسٹمنٹ فورم کے ذریعے امریکی کمپنیاں پاکستان میں سرمایہ کاری کے بے پناہ موقعوں سے فائدہ اٹھا سکتی ہیں۔‘
دوسری جانب ملاقات میں انسداد عسکریت پسندی، سمگلنگ اور انسداد منشیات کے شعبوں میں باہمی اشتراک کار کو بڑھانے پر بھی بات چیت کی گئی۔
مزید پڑھ
اس سیکشن میں متعلقہ حوالہ پوائنٹس شامل ہیں (Related Nodes field)
وزیر داخلہ محسن نقوی نے ایریک مئیر کو انسداد دہشت گردی کے سلسلے میں لیے گئے اقدامات سے آگاہ کیا۔
بقول وزیر داخلہ: ’جون میں اسلام آباد میں مشترکہ کاونٹر ٹیررازم ڈائیلاگ کا انعقاد انسداد دہشت گردی کے سلسلے میں تعاون کو مزید بڑھانے میں اہم ثابت ہو گا۔
’دہشت گردی صرف پاکستان کی جنگ نہیں، اس سے نمٹنے کے لیے عالمی برادری کو پاکستان سے تعاون کرنا ہو گا۔‘
وزارت داخلہ کے بیان میں بتایا گیا کہ ایریک میئر نے مطلوب دہشت گرد شریف اللہ کی گرفتاری میں تعاون پر پاکستان کا شکریہ ادا کیا۔
ملزم محمد شریف اللہ اگست 2021 میں کابل کے حامد کرزئی انٹرنیشنل ایئرپورٹ پر خودکش بم دھماکے میں ملوث تھے۔ اس حملے میں افغانستان سے امریکی افواج کے انخلا کے دوران 13 امریکی فوجی اور 170 کے قریب افغان شہری جان سے چلے گئے تھے۔
شریف اللہ کی گرفتاری کے حوالے سے امریکی صدر ڈونلڈ ٹرمپ نے پاکستان کا شکریہ بھی ادا کیا تھا جبکہ امریکی وزیر دفاع پیٹ ہیگ سیتھ نے پاکستان کی جانب سے تعاون پر خصوصی شکریہ ادا کیا اور کہا تھا کہ ’یہ کارروائی اس (ٹرمپ) انتظامیہ کے دور میں ہوئی، اور میں یہ واضح کرنا چاہتا ہوں۔
’ہماری قیادت، بشمول ڈائریکٹر ریٹکلف اور سینٹ کام اور فوج کے دیگر افسران پاکستانی حکام کو معلومات فراہم کر رہے تھے، جنہوں نے اس پر کارروائی میں ہماری مدد کی۔‘
پاکستان منرلز انویسٹمنٹ فورم کا انعقاد
پاکستان منرلز انویسٹمنٹ فورم 2025 آٹھ اور نو اپریل کو اسلام آباد کے جناح کنوینشن سینٹر میں ہوا۔
پاکستان کی وزارت خارجہ نے اس ایونٹ کے حوالے سے بتایا کہ ’یہ ایونٹ حکومت کی اس وسیع تر حکمت عملی کا حصہ ہے جس کا مقصد پاکستان کو مائننگ کے عالمی مرکز کے طور پر پیش کرنا ہے اور اس کی جیولوجی اور سرمایہ کار دوست پالیسیوں سے فائدہ اٹھانا ہے۔‘
بیان میں کہا گیا کہ پاکستان منرلز انویسٹمنٹ فورم 2025 پاکستان کے مائننگ کے شعبے کے لیے ایک انقلابی موقع کی نمائندگی کرتا ہے۔
