پاکستان کے جنوبے صوبے سندھ میں بھارتی سرحد سے متعصل صحرائے تھر جنگلی حیات کے انواع اقسام کا قدرتی مسکن سمجھا جاتا ہے۔
تقریباً 20 ہزار مربع کلومیٹر پر پھیلے صحرائے تھر میں ہرن، سانپ، نیل گائے، مور، گیدڑ، لومڑی اور چراغ سمیت کئی اقسام کے جنگلی جانور بڑی تعداد میں پائے جاتے ہیں۔ تھر، پاکستان کے ان چند مقامات میں ایک ہے، جہاں معدومی کے شکار گدھ بھی پائے جاتے ہیں۔
تھر میں مصری گدھ ۔ مزید تفصیلات اور تصاویر کے لیے لیفٹ یا رائٹ کلک کیجیے۔
-
1/12
مصری گدھ کو سفید گدھ اور مرغِ فرعون بھی کہا جاتا ہے۔ مصری گدھ ایک شکاری پرندہ ہے جو یورپ، شمالی افریقہ اور برصغیر میں پایا جاتا ہے۔ (تصویر: امرگُرڑو ) -
2/12
زمین پر مصری گدھ کے چلنے کا انداز دیگر پرندوں سے مختلف ہوتا ہے۔ یہ لڑکھڑاتے ہوئے چلتے ہیں۔ (تصویر: امرگُرڑو ) -
3/12
مصری گدھ کی اوسط عمر 37 سال ہوتی ہے۔ یہ نسبتاً چھوٹی جسامت کے ہوتے ہیں۔ تھر میں مصری گدھ بڑی تعداد میں پائے جاتے ہیں۔ (تصویر: امرگُرڑو ) -
4/12
تھر میں قدرتی تالاب، جنہیں مقامی لوگ ترائی کے نام سے پُکارتے ہیں، پر اکثر مصری گدھ دن کے وقت آکر پانی پیتے ہیں۔ (تصویر: امرگُرڑو ) -
5/12
تھر میں قدرتی تالاب یا ترائی نہ صرف جنگلی حیات بلکہ مویشیوں کے پانی پینے کی واحد جگہ ہے۔ (تصویر: امرگُرڑو ) -
6/12
چھوٹی عمر کے مصری گدھ کا رنگ گہرا بھورا، جبکہ جوان گدھ کے سر کا رنگ سفید پیلا ہوتا ہے اور پر کالے ہوتے ہیں۔ (تصویر: امرگُرڑو ) -
7/12
مختلف غیرسرکاری تنظیموں کا دعویٰ ہے کہ مویشیوں کو دی جانے والے ایک دوا ڈائیکلوفینک سوڈیم کے بعد جب وہ جانور مر جاتے ہیں تو ان کو کھا کر گدھ ناپید ہورہے ہیں۔ جبکہ محکمہ جنگلی حیات سندھ اس تھیوری کو رد کرتا ہے۔ (تصویر: امرگُرڑو ) -
8/12
محکمہ جنگلی حیات سندھ کے مطابق گدھوں کی خوراک اور ان کے رہنے کی جگہیں کم ہونے کے باعث وہ ناپید ہورہے ہیں۔(تصویر: امرگُرڑو ) -
9/12
مصری گدھ اکیلے گھومنے کے بجائے جوڑوں یا گروپ کی شکل میں ایک جگہ سے دوسری جگہ جاتے ہیں۔ (تصویر: امرگُرڑو ) -
10/12
مصری گدھ کسی اونچی جگہ یا درخت پر گھونسلہ بناتے ہیں اور سال میں اپریل یا مئی میں دو انڈے دیتے ہیں۔ (تصویر: امرگُرڑو ) -
11/12
مصری گدھ کی خوراک مردہ جانور، مرے ہوئے چھوٹے ممالیہ، چھوٹے پرندے، مچھلی اور انڈے ہیں۔ (تصویر: امرگُرڑو) -
12/12
مصری گدھ، نقل مکانی کرنے والے گدھوں میں سب سے زیادہ دور کے فاصلے تک اڑنے کی صلاحیت رکھتا ہے۔ یہ گدھ ایک دن میں 640 کلومیٹر کا سفر طے کرنے کی صلاحیت رکھتا ہے۔(تصویر: امرگُرڑو )
تھر کے نگرپارکر تحصیل کے پہاڑی سلسلے کارونجھر میں موجود گدھوں پر گذشتہ کئی سالوں سے کام کرنے والے سماجی کارکن رمیش کارونجھری کے مطابق تھر ’وائیٹ بیکڈ‘ یا سفید پشت والے گدھ، لمبی چونچ والے گدھ اور ریڈ ہیڈ یا سُرخ سر والے گدِھوں کا قدرتی مسکن ہے۔ اس کے علاوہ اس وقت یہاں چھوٹے سائز کے مصری گدھ بڑی تعداد میں پائے جاتے ہیں۔
ماضی میں کچھ غیر سرکاری تنظیموں نے گدھوں کو بچانے کے مختلف منصوبے شروع کیے، جن میں بکری کو ذبح کرکے گدِھوں کے کھانے کے لیے مخصوص جگہ پر چھوڑ دیا جاتا تھا۔
مزید پڑھ
اس سیکشن میں متعلقہ حوالہ پوائنٹس شامل ہیں (Related Nodes field)
انڈپینڈنٹ اردو سے گفتگو کرتے ہوئے رمیش کارونجھری نے بتایا: ’تھر میں نگرپارکر کی کارونجھر پہاڑی گدِھوں کے لیے قدرتی مسکن ہے۔ مگر اس کے باوجود یہاں سے گدھ ختم ہورہے ہیں۔ صرف تین سال پہلے تک کارونجھر میں سفید پشت والے گدِھوں کے 35 گھونسلے تھے، مگر آج علاقے میں سفید پشت والا ایک بھی گدھ موجود نہیں ہے۔‘
ان کا کہنا تھا: ’ہمارے سروے کے مطابق اس وقت نگرپارکر اور آس پاس کے علاقے میں سُرخ سر والے صرف پانچ گدھ بچے ہیں، جب کہ لمبی چونچ والے چار سو سے پانچ سو گدھ کارونجھر میں پائے گئے ہیں۔‘
محکمہ جنگلی حیات سندھ کے چیف کنزرویٹر جاوید احمد مہر نے انڈپینڈنٹ اردو کو بتایا: ’گدِھوں کی خوراک صرف مرے ہوئے مویشی ہی نہیں، بلکہ ان کے مسکن میں موجود چوہے اور دیگر چھوٹے جانوروں کے علاوہ مرے ہوئے جنگلی جانور بھی خوراک کا اہم جز ہیں۔ مگر جنگلی جانوروں کی تعداد میں کمی اور گدِھوں کے رہنے کی جگہوں کی کمی کے باعث گدھ ختم ہورہے ہیں۔‘
