پاکستان سپر لیگ کا نواں ایڈیشن بس شروع ہی ہوا چاہتا ہے، اس دوران ملکی کھلاڑیوں کے ساتھ غیر ملکی کھلاڑی بھی اپنی صلاحیتیوں کے جوہر دکھائیں گے۔
اس رپورٹ میں ہم ایسے ہی چند کھلاڑیوں پر نظر ڈالیں گے جو چند ہی لمحات میں جیت دوسری ٹیم سے چھین کر اپنی ٹیم کے نام کرنے میں مہارت رکھتے ہیں۔
ان کھلاڑیوں کو اگر بازی گر کہا جائے تو غلط نہ ہو گا اور جب اپنے شباب پر آجائیں تو طوفانوں کا روپ اختیار کر لیتے ہیں۔
یوں تو پی ایس ایل میں غیر ملکی کھلاڑیوں کے انتخاب پر ہمیشہ تنقید کی جاتی رہی ہے کہ وہ کھلاڑی لیگ میں شامل کیے جاتے ہیں جن کا حالیہ کرکٹ سے کوئی تعلق نہیں ہے۔
تاہم چند کھلاڑی ایسے بھی ہیں جو پی ایس ایل کی کارکردگی کی بنیاد پر اپنی قومی ٹیم تک پہنچ چکے ہیں۔
رائلی روسو
جنوبی افریقہ کے رائلی روسو کی شہرت ایک بے خوف جارحانہ بلے باز کی ہے۔ 2020 کے سیزن میں انہوں نے 44 گیندوں پر ملتان سلطانز کے خلاف سینچری بنائی تھی۔
اس کے علاوہ بھی وہ کئی عمدہ اننگز کھیل چکے ہیں اور اس سیزن میں کوئٹہ گلیڈی ایٹرز کے کپتان بھی مقرر کیے گئے ہیں۔
ان پر بھاری ذمہ داری ہے کہ سرفراز احمد کی سبکدوشی کے بعد اب ان کو بیٹنگ کے ساتھ کپتانی میں بھی جوہر دکھانا ہوں گے۔
رائلی روسو اس نوعیت کے بلے بازہیں جو جارحانہ حکمت عملی پر یقین رکھتے ہیں ان کی یہی خوبی ہو سکتا ہے کوئٹہ گلیڈی ایٹرز کا ماضی واپس لوٹا دے۔
ڈیوڈ ملان
ملتان سلطانز کا حصہ بننے والے انگلینڈ کے ڈیوڈ ملان ٹی 20 کرکٹ کے جانے پہچانے کھلاڑی ہیں وہ ایک سال تک آئی سی سی رینکنگ میں پہلی پوزیشن پر رہے ہیں۔
ملان آئی پی ایل سمیت تمام بڑی لیگز میں مشہور کھلاڑی ہیں۔ وہ اس سے قبل پشاور زلمی اور اسلام آباد یونائیٹڈ کی طرف سے پی ایس ایل کا حصہ رہے ہیں ان کی شمولیت سے ملتان کی بیٹنگ مزید مضبوط ہو گی۔
رسی وان ڈاڈسن
جنوبی افریقہ کے بلے باز رسی ڈاڈسن وقت کے ساتھ ایک قابل اعتماد اور جارحانہ بلے باز کے روپ میں سامنے آئے ہیں۔
وہ ٹی 20 کرکٹ میں آغاز آہستہ کرتے ہیں لیکن ان میں آخری اوورز میں جارحانہ شاٹس کھیلنے کی صلاحیت موجود ہے۔
لاہور قلندرز اگرچہ اس سیزن کی سب سے مضبوط ٹیم ہے لیکن ڈاڈسن اور ڈیوڈ ویزا وہ کھلاڑی ہیں جو ہر جیت کے معمار ثابت ہو سکتے ہیں۔
مزید پڑھ
اس سیکشن میں متعلقہ حوالہ پوائنٹس شامل ہیں (Related Nodes field)
جورڈن کوکس
اسلام آباد یونائیٹڈ نے اس سیزن میں پہلی دفعہ ایسکس انگلینڈ کے فرسٹ کلاس وکٹ کیپر بلے باز جورڈن کوکس کو اپنی ٹیم کا حصہ بنایا ہے اور حیرت انگیز طور پر سب سے اعلی کیٹیگری پلاٹینم میں رکھا ہے۔
کوکس آسٹریلین نژاد انگلش کرکٹر ہیں جو بگ بیش لیگ میں ہوبارٹ کی طرف سے کھیل چکے ہیں۔
آج کل وہ متحدہ عرب امارات میں انٹرنیشنل لیگ کھیل رہے ہیں اور اب تک سب سے زیادہ رنز بنانے والے کھلاڑی ہیں۔
وہ جارحانہ اندازکے اوپنر ہیں اور کولن منرو کے ساتھ ان کی شراکت قابل دید ہو گی۔
شامر جوزف
اگر گذشتہ ایک سال میں کسی کھلاڑی نے سب سے زیادہ ماہرین کرکٹ کو حیران کیا ہے تو وہ ویسٹ انڈیز کے فاسٹ بولر شامر جوزف ہیں۔
جوزف کی طوفانی بولنگ کی بدولت دنیائے کرکٹ کے حکمران آسٹریلیا کو برزبین میں شکست کا سامنا کرنا پڑا۔
شامر جوزف نے زخمی انگوٹھے کے ساتھ زبردست بولنگ کر کے ویسٹ انڈیز کو تاریخی کامیابی دلائی۔
شامر بھی پلاٹینم کیٹیگری میں ہیں تاہم ابھی یہ نہیں معلوم کہ وہ کتنے میچ کھیل سکیں گے۔
کیرن پولارڈ
ویسٹ انڈیز کے کیرن پولارڈ پی ایس ایل میں مختلف ٹیموں کی نمائندگی کر چکے ہیں۔
وہ اس سیزن میں کراچی کنگز کی پلاٹینم کیٹیگری میں ہیں۔ پولارڈ ٹی 20 میں 12 ہزار سے زیادہ رنز بنا چکے ہیں اور کرس گیل اور شعیب ملک کے بعد سرفہرست ہیں۔
پولارڈ خطرناک بلے باز ہیں جو کسی بھی وقت کچھ بھی کر سکتے ہیں۔ ان کے بلند و بالا فلک شگاف چھکے تماشائیوں کو بہت محظوظ کرتے ہیں۔
ان کے علاوہ ٹم سائیفرٹ، شین ردھر فورڈ، جیسن رائے، کولن منرو، گس اٹنکسن اور ڈیوڈ ولی پر بھی سب کی نظریں ہوں گی۔
کیونکہ یہ وہ کھلاڑی ہیں جو اس وقت ہر لیگ میں سرفہرست ہیں اور کسی بھی وقت کھیل کا نقشہ بدل سکتے ہیں۔
مستند خبروں اور حالات حاضرہ کے تجزیوں کے لیے انڈپینڈنٹ اردو کے وٹس ایپ چینل میں شامل ہونے کے لیے یہاں کلک کریں۔
