کرم پولیس کنٹرول روم کے ایک پولیس اہلکار نے نام نہ ظاہر کرنے کی شرط پر بتایا کہ ضلعے کے مختلف علاقوں میں فریقین کے مابین جھڑپیں جاری ہیں۔

 

انہوں نے بتایا کہ جھڑپیں کسی خاص علاقے تک محدود نہیں بلکہ مختلف علاقوں میں جاری ہیں، جس میں جانی نقصان کا خدشہ ہے۔ 

 

پولیس اہلکار کے مطابق، ’ہمارے پاس ابھی تک تصدیق شدہ اعدادوشمار موصول نہیں ہوئے البتہ جھڑپیں مسسلسل جاری ہیں۔‘

لوئر کرم کے علاقے بگن سے تعلق رکھنے والے ایک رہائشی نے نام نہ بتانے کی شرط پر بتایا کہ حالات بہت کشیدہ ہیں۔

انہوں نے بتایا کہ دونوں فریقین ایک دوسرے کے خلاف مورچہ زن ہیں جبکہ مختلف دیہاتوں میں گھروں کو جلانے کا خطرہ ہے۔

’حکومت نام کی کوئی چیز نہیں کہ اس خونریزی اور قتل و غارت کو پر قابو پایا جا سکے۔‘

انہوں نے سیزفائر کے حکومتی اعلان کو ’جھوٹ‘ قرار دیتے ہوئے کہا کہ انہیں کسی قسم کی فائر بندی نظر نہیں آ رہی بلکہ جھڑپیں بڑھ گئی ہیں۔

21 نومبر کو لوئر کرم کے علاقہ مندوری اوچت میں گاڑیوں کے قافلوں پر گھات لگا کر حملے میں 42 افراد کی موت کے بعد علاقے میں جھڑپوں کے دوران مزید 24 افراد مارے گئے ہیں۔

یوں علاقے میں 21 نومبر کے بعد سے اب تک 66 اموات اور کم از کم 120 زخمیوں کی تصدیق ہوئی ہے۔

علاقے میں کشیدہ صورت حال کے باعث ٹل پاڑہ چنار مرکزی شاہراہ ہر قسم کی آمدورفت کے لیے بند ہے جبکہ انٹرنیٹ سروس معطل ہے۔

بیرسٹر سیف کے مطابق تصفیے کے لیے کام کرنے والے جرگے کے اراکین مشران سے ملے، جس کے بعد فائر بندی کے علاوہ اس بات پر بھی اتفاق ہوا کہ وہ ایک دوسرے کے قیدی اور لاشیں واپس کریں گے۔