انڈیا کی راج دھانی دہلی میں 5 فروری کو ہوئے انتخابات میں ووٹوں کی گنتی آج 8 فروری کو شروع ہوچکی ہے اور ابتدائی نتائج کے مطابق حکمراں بھارتیہ جنتا پارٹی سبقت لیے ہوئے ہے۔
الیکشن کمیشن کے ابتدائی نتائج کے مطابق عام آدمی پارٹی (اے اے پی) تیسری بار جیت سے دور ہوگئی ہے اور مرکز میں حکمراں بھارتیہ جنتا پارٹی (بی جے پی) 27 سال بعد واپسی ممکن کر لی ہے۔
دہلی اسمبلی انتخابات کے لیے پولنگ 5 فروری کو ہوئی اور الیکشن کمیشن 8 فروری کو 70 رکنی اسمبلی کے نتائج کا اعلان کرنے کی تیاری کر رہا ہے۔
ایک ہی مرحلے میں منعقد ہونے والے دہلی اسمبلی انتخابات میں 60.42 فیصد رائے دہندگی (ووٹر ٹرن آوٹ) ریکارڈ کی گئی۔ ووٹوں کی گنتی ہفتہ کی صبح سات بجے شروع ہوگی اور شام چھ بجے تک ختم ہونے کی توقع ہے۔
انتخابی کمیشن کی ویب سائٹ پر صبح ساڑھے دس بجے تک کے نتائج کے مطابق بی جے پی 41 نشستیں جیت کر آگے جبکہ عام آدمی پارٹی 29 کے ساتھ پیچھے ہے۔
کون جیت سکتا ہے؟
زیادہ تر ایگزٹ پولز میں بی جے پی کی جیت اور عام آدمی پارٹی کو دھچکا لگنے کی پیش گوئی کی گئی تھی لیکن عوام کا فیصلہ اگلے پانچ سالوں کے لیے قومی راجدھانی میں حتمی قیادت کا تعین کرے گا۔ عوام کو ان سوالوں کے جواب مل سکیں گے کہ عام آدمی پارٹی کی وزیر اعلیٰ آتیشی اور دیگر وزراء کی جگہ کون لیں گے۔
زیادہ تر ایگزٹ پولز نے دہلی میں بی جے پی کی آسانی سے جیت کی پیش گوئی کی تھی، جس میں پی مارک پیپلز پلس، جے وی سی پول، پیپلز انسائٹ اور چانکیہ سٹریٹیجی شامل ہیں۔ دریں اثنا، ماٹریز نے دہلی میں ایک معلق اسمبلی کی پیش گوئی کی ہے۔
مائنڈ بلنک اور وی پریزیڈ واحد ایگزٹ پول تھے جن میں اروند کیجریوال کی عام آدمی پارٹی کی زبردست جیت کی پیش گوئی کی گئی تھی۔
ان ایگزٹ پولز پر مسلسل ردعمل آ رہے ہیں۔ اس سلسلے میں عام آدمی پارٹی کی باغی راجیہ سبھا ایم پی سواتی مالی وال نے ایک بیان میں کہا کہ دہلی کے لوگ بہت سمجھ دار ہیں۔ انہوں نے بہت غور و فکر کے بعد ووٹ دیا ہے۔ ’ایگزٹ پول کبھی صحیح اور کبھی غلط ہوتے ہیں۔ یہ کبھی بہت ہی قریبی مقابلہ ہوتا ہے۔‘
مزید پڑھ
اس سیکشن میں متعلقہ حوالہ پوائنٹس شامل ہیں (Related Nodes field)
اہم مقابلے
سابق وزیر اعلی اروند کجریوال نے نئی دہلی سیٹ سے بی جے پی کے پرویش ورما اور کانگریس کے سندیپ دکشت کے خلاف انتخاب لڑا۔ عام آدمی پارٹی کی امیدوار اور دہلی کی وزیر اعلی ٰ آتیشی نے کالکاجی حلقہ سے کانگریس لیڈر الکا لامبا اور بی جے پی کے رمیش بدھوری کا مقابلہ کیا۔
جنگ پورہ نشست سے عام آدمی پارٹی کے منیش سسودیا کا مقابلہ بی جے پی کے ترویندر سنگھ مرواہ اور کانگریس کے فرہاد سوری سے تھا۔ عام آدمی پارٹی کے سینیئر رہنما ستیندر جین نے شکور بستی سے بی جے پی کے کرنیل سنگھ کے خلاف مقابلہ کیا۔
کیا عام آدمی پارٹی کی ہیٹ ٹرک ہوگی یا بی جے پی کی تاریخی واپسی ہوگی؟
اگر بی جے پی جیت جاتی ہے تو یہ تاریخ کا ایک تاریخی لمحہ ہوگا کیونکہ پارٹی 27 سال کے انتظار کے بعد دہلی میں اقتدار میں واپس آئے گی۔
عام آدمی پارٹی کے لیے 2025 کے دہلی انتخابات میں جیت اروند کیجریوال کی حکمراں پارٹی کی ہیٹ ٹرک ہوگی۔ مرکز کے زیر انتظام علاقے میں حکومت بنانے کے لیے کسی بھی پارٹی کو کم از کم 36 نشستیں جیتنے کی ضرورت ہوتی ہے۔
دہلی اسمبلی انتخابات کے نتائج سے قبل 19 گنتی مراکز کے لیے 10,000 پولیس اہلکاروں کے ساتھ تین سطح پر سکیورٹی انتظامات کیے گئے ہیں، جن میں ہر مرکز میں دو نیم فوجی کمپنیاں بھی شامل ہیں۔
نتائج انڈین الیکشن کمیشن کی ویب سائٹ پر دستیاب ہوں گے۔ eci.gov.in اور results.eci.gov.in
اروند کیجریوال کی عام آدمی پارٹی نے تمام نشستوں پر انتخاب میں حصہ لیا ہے اور اسے اپنے گورننس ٹریک ریکارڈ اور فلاحی اقدامات پراعتماد ہے۔ دوسری جانب بی جے پی نے عام آدمی پارٹی کو ’بدعنوان‘ ظاہر کرنے کے لیے میڈیا پر مہم چلائی ہے۔
تیسری بڑی جماعت کانگریس کو بہتر کارکردگی کی امید ہے، جو گذشتہ دو انتخابات میں ایک بھی نشست حاصل کرنے میں کامیاب نہیں رہی ہے۔
